Fish's Blog

ჩემი გაზრდილი, მოვლილი, ნაზრუნები და ნაფერები კატის დაღუპვის შემდეგ კიდევ უფრო გამიმძაფრა გრძნობები ცოცხალი არსებების მიმართ. ახლაც ტკივილი მიპყრობს, რომ წარმოვიდგენ რას გრძნობდა ჩემი ფისო სიკვდილის ბოლო წუთებში და ეს შეგრძნება შიგნიდან მღრღნის, ყელში ბურთი მეჩხირება და ხანდახან ისიც მგონია რომ ოდესმე შეიძლება დამიბრუნდეს. ადრეც დამიწერია, რომ განსაკუთრებულ კავშირს ვგრძობ ბუნებასთან, ძალიან მსიამოვნებს ცხოველებზე, მწერებზე და მცენარეებზე დაკვირვება, ზოგადად დაკვირვება ალბათ ჩემი ყველაზე საყვარელი საქმიანობაა, ყოველი ფოთლის აღმოცენება და გაშლა სასწაულად მიმაჩნია.

Monarch-Butterflies-In-Flight-copyრამდენიმე დღის წინ ჩავიარე რუსთაველის მეტროსთან, მთელი კედელი მცენარეებით რომ არის დაფარული აი იმ ადგილას და რაღაც ვიგრძენი, არ ვიცი ეს რა იყო, თითქოს გავიაზრე რომ სუნთქავს და თავისი ცხოვრება აქვს, დაბადება, განვითარება, ცხოვრება (ისიც ხომ გრძნობს ქარებს, წვიმას, ისიც ხომ სუნთქავს მანქანების გამონაბოლქვს, მასაც ხომ აწუხებს ტრანსპორტის ხმაური). ვიგრძენი რომ დამოუკიდებელი არსებაა, როგორც ადამიანის მამოძრავებელი სითხე – სისხლი მიექანება სისხლძარღვებში, მასშიც არის ასეთივე ძარღვები, რომელშიც მიედინება სასიცოცხლო წვენები, მიდის ფოტოაინთეზის რეაქცია და კიდევ ვინ იცის რამდენი რამ ხდება ამ ერთი შეხედვით უბრალოდ ლამაზ ქმნილებაში, რაღაც დავინახე მასში არ ვიცი როგორ უნდა ავხსნა ეს ყველაფერი, მერე ბუჩქებს გადავხედე და ისევ იგივე ვიგრძენი, სიტყვებით აღუწერელი მოწიწება. ჩავუარე ამ ხასხასა, ჯანმრთელ ბუჩქებს და შემრცხვა. ბავშვობაში რამდენჯერ მომიწყვეტია ფოთოლი ბუჩქიდან ან ხიდან, ისე უბრალოდ, აზრის დატანების გარეშე, მერე ხელში მითამაშია და გადამიგდია. შემრცხვა რომ ვატკინე, შემრცხვა რომ მოვკალი.

Read the rest of this entry »

Advertisements

61081-Don-t-Rush-Anythingვინმესთვის შეიძლება ცრუ მორწმუნე ვარ, აი მე კი მაინც მჯერა ნიშნების, ვცდილობ ნიშნები დავინახო, ჩავწვდე მათ არსს და მივსდიო მათ. იმისაც მჯერა რომ წიგნი, ფილმი, ვიდეო ან მუსიკა სწორედ მაშინ ჩნდება ჩვენს ცხოვრებაში, როდესაც მათი დრო მოდის. ყველაფერი კანონზომიერია, ძალით გაკეთებული საქმე არ გამოვა, დროს უნდა დაელოდო და როცა დრო მოვა ყველაფერი ისე მარტივად გამოვა რომ თვითონაც ვერ დაიჯერებ.

1fbbbfa83348bd9481af70e3e846f838

ბოლო რამდენიმე თვის მანძილზე იმდენი დამთხვევა ხდება ჩემს ცხოვრებაში, თითქოს სამყარო მელაპარაკება და მეც ვიჯერებ რომ სწორი გადაწყვეტილება მივიღე.

რა არის სწორი და არასწორი? კითხვა, რომელსაც, ალბათ, ყველაზე ხშირად ვუსვამთ საკუთარ თავს. როგორ ვიპოვოთ პასუხი? ჩემს თავს არ ვიცნობ და ეს ყველაზე დიდი გამოწვევაა ამ ცხოვრებაში ჩემთვის, არ ვიცი როდის რას გავაკეთებ, ხანდახან ისიც არ ვიცი როდის რას ვგრძნობ, ამ მთავარ კითხვაზე (რა არის სწორი და არასწორი?) პასუხის გაცემაც ამიტომ მიჭირს. ყველაფრის ლოგიკაში მოქცევას ვცდილობ, თუმცა სჯობს ხანდახან მხოლოდ გულს მიენდო და ნიშნებს მოუსმინო. სჯობს პლატონის აზრი გავატარო ჩემს თავში – “ნამდვილი საგნების ჭვრეტა სხვა არა არის რა, თუ არა სულის აღმასვლა გონით საწვდომი სამყაროს მიმართ”* – იმისთვის რომ შევძლო დანახვა რა არის მთავარი, მნიშვნელოვანი, ნამდვილი და ასე მაინც გამიადვილდეს მივხვდე რა არის სწორი და არასწორი.
Read the rest of this entry »

რა არის უკუკავშირი ანუ იგივე ფიდბექი, რატომ არის ის აუცილებელი წინსვლისთვის, განვითარებისთვის და რატომ იღებენ მას საქართველოში უარყოფითად, როგორც ჭკუის სწავლებად ცუდი გაგებით. პასუხი მარტივია – არავის მოსწონს, როდესაც მას აკრიტიკებენ, ჭკუას არიგებენ და მიუთითებენ რა და როგორ უნდა გააკეთოს, თუმცა თუ დავფიქრდებით მხოლოდ კრიტიკამ შეიძლება გვაქციოს უკეთესებად, რა თქმა უნდა ამ შემთხვევაში მნიშვნელოვანია კრიტიკის სწორად აღქმა, გააზრება და იმ გზების ძიება, რაც გაუმჯობესებისკენ მიგვიყვანს.

creativefeedback_2x

ეს თემა დიდი ხანია მაწუხებს და გადავწყვიტე ცოტა მეძია და ჩემი აზრი ჩამომეყალიბებინა ამ საკითხებთან დაკავშირებით.
ძიების მთავარი კითხვებია:
რა არის ეს უკუკავშირი და რა არის მისი მიზანი?
რა მოხდება უკუკავშირის იგნორირების შემთხვევაში?
რა მოხდება უკუკავშირის მიღების შემთხვევაში?
Read the rest of this entry »

თავიდანვე შევთანხმდეთ რომ სიმართლე და ჭეშმარიტება სრულიად განსხვავებული ცნებებია, ვფიქრობ ჭეშმარიტება უნდა იყოს ის რაც მუდმივია, და ვფიქრობ მისი წვდომა ადამიანის გაგებისთვის შეუძლებელია, ეს ჩემი აზრია!

აი სიმართლეს რაც შეეხება, ვფიქრობ ქვეყანაზე იმდენი სიმართლეა რამდენი ადამიანიც. ჩემთვის ყველაზე საზარელი ფრაზაა – არ ხარ მართალი! – რაოდენ სულელურადაც არ უნდა მოგეჩვენოთ, მე მგონია, რომ ყველა მართალია და ვეცდები როგორმე ეს ჩემი აზრი გავშალო.

ვფიქრობ ყველს თავისი სიმართლე აქვს, და შესაბამისად ყველა მართალია! ვინაიდან ყოველი ინდივიდი, თავისი ინდივიდუალურობიდან გამომდინარე ყოველ საგანსა თუ მოვლენას თავისი კუთხიდან შეჰყურებს, საგანს და მოვლენას კი იმდენივე კუთხე აქვს რამდენი ადამიანიც შეჰყურებს მას, ილუზიაა ეს ყველაფერი, იმიტომ რომ ჩვენ ილუზორულ სამყაროში ვარსებობთ, სადაც ყველაზე მთავარი განზომილება არა სიმაღლე, სიგანე ან სიღრმე, ანუ ადგილი, არამედ დროა, ჩვენ კონკრეტულ ადგილას კონკრეტულ დროში ვარსებობთ და რომ არა დრო, საერთოდ არ ვიარსებებდით, დრო სხვა საკითხია, და მის განხილვას სულ არ ვაპირებდი ახლა, უბრალოდ სიტყვამ მოიტანა, ამით იმის თმა მინდოდა, რომ საგნის ან მოვლენის ანალიზისას ყველაზე მნიშვნელოვანი კრიტერიუმი, რაც გასათვალისწინებელია არის სწორედ დრო. სწორედ იმ კონკრეტულ მომენტში ადამიანის განწყობა, წარსულის გამოცდილება ქმნის წარმოდგენას საგანსა თუ მოვლენაზე, რაც შემდგომში ქმნის საკუთარ აზრს, საკუთარ სიმართლეს. მგონია, ერთსა და იმავე ადამიანს სხვადასხვა აზრი ექნება ერთსა და იმავე მოვლენაზე დროის ბადეზე სხვადასხვა წერტილზე ყოფნისას. მე მგონი გაურკვევლად ვლაპარაკობ, იმის თქმა მინდა რომ ერთ ადამიანსაც კი შესაძლოა ჰქონდეს სხვადასხვა სიმართლე, თუ მას მოუწევდა ერთი და იგივე მოვლენის შეფასება, ცხოვრების სხვადასხვა ეტაპზე.

და ამის შემდეგ, თუ დავფიქრდებით რომ სხვადასხვა ადამიანს შეიძლება სხვადასხვა აზრი ანუ სიმართლე ჰქონდეს ერთსა და იმავე მოვლენაზე, ამაში უჩვეულოს ვერაფერს დავინახავთ. აქ უნდა გავიაზროთ, რომ ყოველ ადამიანს გამოცდილებების უნიკალური ნაკრები აქვს, სწორედ ამით განვსხვავდებით ადამიანები ერთმანეთისგან, განსხვავებული გამოცდილებების ქონით. ისიც გასათვალისწინებელია, რომ ერთი და იგივე გამოცდილება, მაგალითად თუნდაც პირველად გაცურვა რომ ავიღოთ სამსჯელოდ, ეს ყოველი ინდივიდისთვის სხვადასხვა განცდის, ემოციის მომგვრელია, ამის გათვალისწინებით კი თითოეული ადამიანის გამოცდილებების ნაკრები კიდევ უფრო უნიკალური ხდება, შესაბამისად ერთი და იგივე მოვლენის ჭვრეტისას და გაანალიზებისას შეუძლებელია ორ ადამიანს ზუსტად ერთნაირი განწყობა, ემოცია ეუფლებოდეს, წარსულის გამოცდილებების გათვალისწინებით. აქ ვსაუბრობ ემოციაზე, პირად განცდებზე რაც გულიდან მოდის, რაც სულიდან მოდის, ვინაიდან მე ვფიქრობ რომ ყოველი ადამიანი, მოვლენის შეფასებისას მაინც გულიდან და სულიდან წამოსული გრძნობებით აკეთებს ანალიზს. ჩემი აზრით ადამიანს არ ძალუძს ობიექტური, კომპიუტერული, მანქანის მაგვარი, ზუსტი შეფასება გააკეთოს, ვინაიდან ის ადამიანია!

62a1fce2002097be2d3c2993ba78e3d2ვიცი ბევრი შემედავება, ან იფიქრებს ეს სულელი ხომ არ არის, როგორ შეიძლება მხოლოდ გულზე და სულიდან წამოსულ ემოციებზე ააგოს გონიერმა და განათლებულმა ადამიანმა თავისი წარმოდგენა, ანალიზი და სიმართლეო, თუმცა სწორედ ეს არის ჩემი აზრი. აქ კი დავამატებ, რომ სულიდან წამოსული ემოციებიც თავისთავადი არ არის, მასაც წვრთნა სჭირდება, რათა ისწავლო მართვა და მიხვდე, რომელი ემოციაა ბუნებრივი და მართალი, აი ისევ მივადექით იგივე კითხვას: და როგორ მივხვდე რომ ჩემი ემოცია მართალია? როგორ მივხვდე კარგია თუ ცუდი ის რასაც ვფიქრობ, კეთილია თუ ბოროტი? ამ კითხვებზე პასუხის ძიება არის ცხოვრება. ხანდახან მგონია ვიპოვე პასუხი, და მგონია რომ მართალი ემოცია არის ის, რომელიც კეთილია, უბოროტო, ნეგატივისაგან თავისუფალი. და აი აქ ისევ ჩიხია – ნეგატივი და პოზიტივი ეს ხომ ისევ შეგრძნებებს ეფუძნება, ასე გამოდის თითქოს გონებით ვერაფერს ჩაწვდები და ემოციებს უნდა მიენდო. არ ვიცი, არაფერი არ ვიცი.

დავუბრუნდები მოვლენის გაანალიზებას, თუმცა ახლა გონებას მოვუხმობ, და ცოტა ხნით დავივიწყებ რომ ადამიანი ვარ და ემოციები გამაჩნია, ამ შემთხვევაში ცხოვრება ბევრად მარტივი იქნებოდა. იარსებებდა კონსტანტები, ჭეშმარიტებები არ მოგვიწევდა მსჯელობა, ფიქრი და ადვილად ჩამოვაყალიბებდით აზრს მოვლენაზე. აქ, ასეთ სამყაროში სიმართლე არ იარსებებდა და იქნებოდა მხოლოდ ჭეშმარიტება, ანუ ის რისკენაც მივილტვით ასე გამალებით, რასაც ვეძებთ და ვერასოდეს ვიპოვით. მაგრამ ექნებოდა ამ ჭეშმარიტებას ფასი? ფასი აქვს იმას რასაც ოფლით მოიპოვებ, მიაღწევს, იშრომებ და დაჯილდოვდები.

2dacb164979506c9e1200bc8951e7a18

სწორედ ამიტომ დიდი იმედი მინდა ვიქონიო, რომ ემოციების გზითაც შეიძლება ჭეშმარიტებამდე მისვლა, რაც იქნება ნამდვილი ჭეშმარიტი ჭეშმარიტება და არა – ლოგიკური გამოთვლების შედეგად მიღებული ჭეშმარიტება.

დიდი ხანია გადავწყვიტე ჩემი აზრები ჩემთვის შემენახა, და ამ მიზნით რამდენი ხანი გასულა რაც არაფერი დამიპოსტავს ჩემს ბლოგზე. მიზეზი მრავალია:

486b9ccfe929a99d27b0f65d462cce571. ძირითადად ჩემთვის წერის ინსპირაცია ნაცნობების თუ უცნობების გამოთქმული ფრაზებია, რომელსაც ან საუბარში/კამათში ვიჭერ ან გაჩერებაზე როცა ავტობუსს ველოდები ხოლმე. ამიტომაც არ მინდა ნაცნობებმა თავისი თავი ან ფრაზა ამოიცნონ, ჩემს კრიტიკაში, მოკლედ იმის თქმა მინდა რომ არ მინდა ვინმეს ვაწყენინო, მიუხედავად იმისა რომ მათი აზრები შეიძლება რადიკალურად ეწინააღმდეგებოდეს ჩემს მიერ სამყაროს აღქმას, მენტალობას და მსოფლმხედველობას. ასეთი ვარ, სხვის წყენინებას მირჩევნია მე მეწყინოს, იდიოტი ვარ 🙂

c86e4867d96a1e54c3ca387c43643cb32. საერთოდ ძალიან ჩაკეტილი ადამიანი ვარ, ცოტა ხნის წინ აღმოვაჩინე რომ ინტროვერტი ვყოფილვარ. ინსტროვერტისთვის დამახასიათებელი თვისებების ჩამოთვლას არ დავიწყებ, თუმცა უმრავლესობა ნამდვილად მაქვს, პატარა ასაკში კი ალბათ სულ ყველა მქონდა. მოკლედ უკვე თითქმის 30 წლის ვარ და ვისწავლე ამ თვისებებით ცხოვრება. რამდენიმე წელია არ გამიგია ფრაზა “რა უცნაური ხარ” ჩემს მიმართ, რაც ძალიან მახარებს, იმიტომ რომ სიკვდილივით მეზიზღება ეგ ფრაზა. მოკლედ ახლა ამ ასაკში მეტ-ნაკლებად ნორმალური ვარ, თუმცა იმაზე ფიქრი რომ ვიღაც ადამიანი, რომელიც არ მიცნობს (ან სასხვათაშორისოდ მიცნობს), შემოვა ჩემს ბლოგზე და წაიკითხავს ჩემს აზრებს საშინლად მაშფოთებს.
691951dfc2e4643752b0b344dfdd3b2b3. რა საჭიროა წერო საჯაროდ, როცა შეგიძლია ტელეფონში ჩაინიშნო შენი აზრები, და გათავისუფლდე მათგან, ეს ხომ ძალიან კარგი თერაპიაა. თან ერიკს თუ დავუჯერებთ წერა უამრავი პრობლემების მოგვარებაშიც კი დაგეხმარება. ეს ბლოგი ნამდვილი საუნჯეა და ყველას გირჩევთ გადახედოთ ❤

ეს ის რამდენიმე მიზეზია რატომაც ვინახავ ჩემს აზრებს ჩემთვის, თუმცა დღეს როგორც ხედავთ გადავწყვიტე დამეწერა. ამის მიზეზი კი ის გახლავთ, რომ აღმოვაჩინე თუ რამდენი გამომწერი მყოლია და ტრაფიკიც გადატვირთული მეჩვენა. კომპლიმენტებიც მივიღე კარგად წერო, ამან კი მოტივაცია მომცა და ჰირ აი ემ, ვწერ იმაზე თუ რატომ არ ვწერ და მგონი დროა ამ პოსტის მთავარ საკითხზე გადავიდე, ნამდვილად დროა!

Read the rest of this entry »

Me & Me

არქივი

გამოიწერეთ ახალი პოსტები!
დააკლიკეთ და ახალი პოსტის შესახებ ინფორმაციის მიიღებთ EMAIL-ზე.

Join 421 other followers

Follow Fish's Blog on WordPress.com
Advertisements